ກອງປະຊຸມໃຫຍ່ ຄັ້ງທີ VIII ຂອງຄະນະພັກຮາກຖານຫ້ອງວ່າການແຂວງໄດ້ ໄຂຂຶ້ນໃນວັນທີ 18 ມີຖຸນາ 2025, ທີ່ຫ້ອງວ່າການແຂວງ, ໂດຍໃຫ້ກຽດເຂົ້າຮ່ວມຂອງ ສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຈຳປາສັກ, ມີສະຫາຍ ສົມບູນ ເຮືອງວົງສາ ຄະນະປະຈຳພັກແຂວງ ຮອງເຈົ້າແຂວງຈຳປາສັກ, ສະຫາຍ ສຸກກະເສີມ ສີຫານຸວົງ ກຳມະການພັກແຂວງ ຮັກສາການເລຂາຄະນະພັກຮາກຖານ ຫົວໜ້າຫ້ອງວ່າການແຂວງ; ມີ ທ່ານຮອງຫົວໜ້າຄະນະຈັດຕັ້ງແຂວງ, ມີເລຂາ-ຮອງເລຂາໜ່ວຍພັກ, ມີອະດີດເລຂາ,ຮອງເລຂາຄະນະພັກຮາກຖານຫ້ອງວ່າການແຂວງ, ຕະຫຼອດຮອດ ສະມາຊິກພັກສົມບູນທົ່ວຮາກຖານທັງໝົດ ເຂົ້າຮ່ວມ.

ສະຫາຍ ສຸກກະເສີມ ສີຫານຸວົງ ກ່າວເປີດກອງປະຊຸມວ່າ: ການດຳເນີນກອງປະຊຸມໃຫຍ່ ຄັ້ງທີ VIII ຂອງຄະນະພັກຮາກຖານຫ້ອງວ່າການແຂວງ ແມ່ນການຈັດຕັ້ງປະຕິບັດຢ່າງເຄັ່ງຄັດ ຕໍ່ກົດລະບຽບພັກ ກໍຄືຫຼັກການ ແລະ ທິດນຳຂອງການກໍ່ສ້າງພັກພວກເຮົາ ໃຫ້ມີການເຕີບໃຫຍ່ ກ້າວຂຶ້ນຢ່າງບໍ່ຢຸດຢັ້ງ ກອງປະຊຸມໃຫຍ່ພວກເຮົາໃນຄັ້ງນີ້ ຈະໄດ້ພ້ອມກັນຄົ້ນຄວ້າ, ຮັບຮອງເອົາເອກະສານທີ່ເປັນຍຸດທະສາດຂອງ ຄະນະພັກຮາກຖານຫ້ອງວ່າການແຂວງ ສະໄໝທີ VIII, ພ້ອມກັນຄັດເລືອກເອົາຄະນະພັກຮາກຖານຊຸດໃໝ່ ເພື່ອເປັນແກ່ນນຳຂອງຄະນະພັກຮາກຖານ, ເພື່ອຜັນຂະຫຍາຍມະຕິຂອງພັກ ແລະປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃນຕະຫຼອດສະໄໝທີ VIII (2025-2029) ໃຫ້ປະກົດຜົນເປັນຈິງ ເພື່ອນຳພາຄະນະພັກຮາກຖານ ຫ້ອງວ່າການແຂວງພວກເຮົາ ກ້າວຂຶ້ນຢ່າງບໍ່ຢຸດຢັ້ງ.

ກອງປະຊຸມໃຫຍ່ ຄັ້ງທີ VIII ຂອງຄະນະພັກຮາກຖານຫ້ອງວ່າການແຂວງ ໄດ້ພ້ອມກັນຄົ້ນຄວ້າຢ່າງເລິກເຊິ່ງ, ປະກອບຄໍາຄິດຄໍາເຫັນຢ່າງຕັ້ງໜ້າ ແລະ ເປັນເອກະພາບຮັບຮອງເອົາລາຍງານການເມືອງ ແລະ ບົດສໍາຫຼວດການນໍາພາລວມຂອງຄະນະພັກຮາກຖານຫ້ອງວ່າການແຂວງຊຸດເກົ່າ ເຊິ່ງຕີລາຄາດ້ານດີ, ດ້ານອ່ອນຂໍ້ຄົງຄ້າງ, ສາເຫດ, ບົດຮຽນໃນການນໍາພາ-ຊີ້ນຳຕະຫຼອດສະໄໝ ໄລຍະ 5 ປີຜ່ານມາ; ຕໍ່ກັບຜົນງານດ້ານດີທີ່ຕັ້ງໜ້າທີ່ຍາດມາໄດ້ໃນແຕ່ລະຂົງເຂດວຽກງານ ເປັນຕົ້ນ: ວຽກງານເສນາທິການ, ປະສານງານ ແລະ ບໍລິການຮັບໃຊ້, ວຽກງານປັບປຸງຄວາມເຂັ້ມແຂງດ້ານກົງຈັກ, ບຸກຄະລາກອນ, ພື້ນຖານວັດຖຸເຕັກນິກ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດ; ວຽກງານກໍ່ສ້າງພັກ-ພະນັກງານ,  ວຽກນຳພາອົງການມະຫາຊົນຂອງພັກ ແລະ  ວຽກນຳພາສ້າງເສດຖະກິດຄອບຄົວ ທັງໝົດເຫຼົ່ານັ້ນໄດ້ເປັນພື້ນຖານ ແລະ ຖ່ວງທ່າອັນໜັກແໜ້ນ ໃຫ້ແກ່ການສືບຕໍ່ກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນໃນທົ່ວຄະນະພັກຮາກຖານ ຫ້ອງວ່າການແຂວງ.

ຄະນະພັກຮາກຖານຫ້ອງວ່າການແຂວງ ມີ 7 ໜ່ວຍພັກທີ່ຂື້ນກັບ, ມີຄະນະພັກຮາກຖານ 3 ສະຫາຍ,ຍິງ1 ສະຫາຍ,ມີສະມາຊິກພັກທັງໝົດ 83 ສະຫາຍ,ຍິງ 21 ສະຫາຍ. ແລະ ກອງປະຊຸມນີ້, ຜູ້ແທນກອງປະຊຸມໄດ້ພ້ອມກັນໃຊ້ສິດ ປະຊາທິປະໄຕຂອງຕົນ ປ່ອນບັດຄັດເລືອກ ເອົາຄະນະພັກຮາກຖານ ຊຸດໃໝ່ ບົນພື້ນຖານຄວາມຖືກຕ້ອງ ສອດຄ່ອງກັບມາດຖານເງື່ອນໄຂທີ່ກຳນົດໄວ້ ມີຜູ້ອອກສະໝັກເລືອກຕັ້ງທັງໝົດ 7ສະຫາຍ,  ເລືອກເອົາ 5 ສະຫາຍ.  ຜ່ານການລົງຄະແນນສຽງເລືອກຕັ້ງ ແລະ ກອງປະຊຸມຄັ້ງປະຖົມມະລຶກໄດ້ຮັບຮອງເອົາເລຂາ, ຮອງເລຂາ, ປະທານກວດກາຄະນະພັກຮາກຖານ ຄື: ສະຫາຍ ສຸກກະເສີມ ສີຫານຸວັງ ເປັນເລຂາຄະນະພັກຮາກຖານຫ້ອງວ່າການແຂວງຈໍາປາສັກ;  ສະຫາຍ ທຳມະວົງ ສຸລິຍະວົງ ເປັນຮອງເລຂາຄະນະພັກຮາກຖານ; ສະຫາຍ ນາງ ໄຊຍະລິດ ວົງສາລະວັນ ປະທານກວດກາ ຄະນະພັກຮາກຖານ.