ຫ້ອງວ່າການ 5 ແຂວງ ພົບປະແລກປ່ຽນວຽກງານ ດ້ານວິຊາການ
23/07/2025
ກອງປະຊຸມ ພົບປະແລກປ່ຽນວຽກງານຫ້ອງວ່າການ 5 ແຂວງມີ ແຂວງສະຫວັນນະເຂດ, ເຊກອງ, ອັດຕະປື, ສາລະວັນ ແລະ ແຂວງຈໍາປາສັກ ຈັດຂຶ້ນໃນວັນທີ 19 ກໍລະກົດ 2025 ທີ່ແຂວງສະຫວັນນະເຂດ ໂດຍການເປັນປະທານຮ່ວມຂອງທ່ານ ພູລໍາພອນ ສີຫາວົງ ຫົວໜ້າຫ້ອງວ່າການແຂວງສະຫວັນນະເຂດ ພ້ອມດ້ວຍຜູ້ຕາງໜ້າຈາກ 5 ແຂວງ, ຂະແໜງ ແລະ ພະນັກງານ-ລັດຖະກອນ ເຂົ້າຮ່ວມ. ການພົບປະຄັ້ງນີ້, ເພື່ອເປັນການຂະຫຍາຍການຮ່ວມມື-ແລກປ່ຽນບົດຮຽນ ດ້ານວິຊາການ ຂອງຫ້ອງວ່າການແຂວງ ໃຫ້ສາມາດຂະຫຍາຍກວ້າງຂວາງ ໂດຍໄດ້ປຶກສາຫາລື ແລະ ແລກປ່ຽນບົດຮຽນວຽກງານ ຂອງຫ້ອງວ່າການໃນແຕ່ລະດ້ານ, ເພື່ອແລກປ່ຽນກັນໃນແຕ່ລະແຂວງ ເຊິ່ງມີຄວາມຈຳເປັນ
ແລະ ສຳຄັນທີ່ສຸດ ເພື່ອເປັນຂໍ້ມູນສຳຄັນໃຫ້ແກ່ບັນດາແຂວງ ນຳໄປຄົ້ນຄວ້າປັບປຸງ ແລະ ພັດທະນາວຽກງານຮອບດ້ານ ຂອງຫ້ອງວ່າການ ໃຫ້ເໝາະສົມກັບຄວາມເປັນຈິງ ແລະ ສອດຄ່ອງກັບສະພາບການ ພັດທະນາເສດຖະກິດ-ສັງຄົມພາຍໃນແຂວງຂອງຕົນໃນແຕ່ລະໄລຍະ. ກອງປະຊຸມຄັ້ງນີ້ ໄດ້ກໍານົດເອົາຫົວຂໍ້ ທີ່ຕິດພັນກັບວຽກງານຂອງຂະແໜງການພາຍໃນ ຫ້ອງວ່າການແຂວງ ມາປຶກສາຫາລື ແລະ ແລກປ່ຽນບົດຮຽນຮ່ວມກັນ, ພ້ອມທັງຮັບຮອງເອົາຫ້ອງວ່າການແຂວງຄຳມ່ວນ ເພື່ອເຂົ້າຮ່ວມ ການພົບປະແລກປ່ຽນວຽກງານຫ້ອງວ່າການ ໃນປີຕໍ່ໜ້າ ແລະ ແຂວງສາລະວັນ ຈະເປັນເຈົ້າພາບຈັດງານດັ່ງກ່າວ ໃນປີຕໍ່ໄປ.
